Јуниорската репрезентација на Македонија (до 20 години) по поразите од Шведска и Унгарија во втората фаза од Европското Првенство што се игра во Данска, во петок ќе разигрува против селекцијата на Србија за дефинирање на пласманот на ЕП.

Македонија ја заврши втората фаза на четвртата позиција во групата, по што ќе се сретне со третопласираната селекција од другата група за пласман – селекцијата на Србија. Натпреварот против Србија ќе се одигра во петок од 13:00 часот, а победникот во сабота ќе игра против подобриот од мечот Шведска – Русија за 13-та позиција на ЕП. Поразените две селекции од овие два натпревари, во сабота ќе играат за пласман на 15-та позиција.

Европското Првенство до 20 години во Данска завршува во недела, а нашата репрезентација во понеделник рано изутрина се враќа за Скопје.