Машката ракометна репрезентација на Македонија денеска одработи тренинг и во елитната „Таурон“ арена, местото каде утре од 18:00 часот ќе го започне настапот на ЕП против силната Франција.
Во добра позитивна атмосфера, нашата репрезентација фокусирана на големиот предизвик кој се наоѓа пред неа, ги минува последните часови пред почетокот на континенталниот собир. Откако вчера избраниците на Ивица Обрван тренираа во тренинг-салата во Краков, денеска го одработија својот прв тренинг и во новата „Таурон“ арена. Пред почетокот на тренингот, членовите на нашата репрезентација присуствуваа и на краток брифинг со медиумите, претставувајќи ги очекувањата од натпреварите кои следат.
Репрезентацијата на Македонија утре од 18:00 часот против Франција ќе го стартува Европското Првенство. Во нашата група утре од 20:30 ќе играат Србија и домаќинот Полска.