Машката ракометна репрезентација на Македонија доживеа пораз од Хрватска (34-24) на отворањето на втората фаза од Европското Првенство во Полска.

Рано во натпреварот во Таурон арената, Хрватите со брза игра во нападот и цврста одбрана, поведоа со 7-1, по што нашата репрезентација не успеа да се рехабилитира. Предводени од Дејан Манасков кој во првото полувреме реализираше 6 голови од исто толку обиди, нашите репрезентативци се доближија до 17-13, резултат со кој се замина на пауза, но Хрватска не дозволи посериозно приближување и со контрола врз играта и резултатот, до крај само го зголемуваше водството за конечни 34-24. Селекторот Ивица Обрван на натпреварот им даде поголема минутажа и на резервните играчи, одморајќи ги првотимците по тешките први три средби и во пресрет на последните два натпревари од групата.

Манасков со вкупно 7 голови го заврши натпреварот како најпрецизен во нашиот тим, а уште во листата на стрелци се запишаа и Филип Кузмановски со 4 голови, Стоилов и Георгиевски кои постигнаа по 3 голови, Митков, Мојсовски и Ојлески беа реализатори на по 2 гола, а еден гол додаде и Филип Миркуловски.

Следуваат три слободни денови за нашата репрезентација, а следниот натпревар го играме на 25 јануари кога за противник ќе ја имаме селекцијата на Белорусија. Последниот меч од групата ќе го играме на 27 јануари против Норвешка.