Наши пријатели

Македонија поразена од домаќинот Хрватска на отворањето на турнирот во Умаг

Сениорската машка репрезентација на Македонија, која со сериозно подмладен состав замина на турнирот во Умаг, доживеа пораз од 29-21 на отворањето од домаќинот Хрватска. Утре избраниците на Ивица Обрван, ја играат и втората средба против Црна Гора.

Слабиот почеток на натпреварот во кој нашите репрезентативци направија неколку технички грешки, дозволи Хрватска по нецели 10 минути игра да стигне до водство од 7-2. По тајм-аутот на Обрван, Македонија ја консолидираше играта. Жарко Пешевски имаше свои минути во тој период од натпреварот, но и покрај тоа што во еден момент успеавме и да намалиме, на пауза се замина со 17-12 за домаќинот.

Во второто полувреме, нашите ракометари се доближија на три гола негатива (19-16 и 21-18), сепак селекторот Обрван, како што и порано најави, посериозна минутажа им даде на помладите играчи, кои и покрај обидите немаа сили да го задржат темпото и Хрватска пред крајот успеа да се одлепи на највисоки и конечни 29-21.

Жарко Пешевски со 6 погодоци беше најпрецизен во нашиот состав, а Кирил Лазаров додаде 5 голови. Одлична вечер имаше младиот Филип Талески кој реализираше 4 голови и за кого пофални зборови имаше и Ивица Обрван во изјавата за медиумите по натпреварот. Кај Хрватска, најдобар беше Златко Хорват со 7 голови постигнати од исто толку обиди.

Вториот натпревар на турнирот во Умаг, нашата репрезентација го игра утре од 19:00 часот а противник е составот на Црна Гора. За потсетување, турнирот во хрватскиот град се игра во склоп на ЕХФ неделата, која претставува подготовка на ракометарите пред ЕП во Полска во јануари 2016.

Слични вести

Ракометна Федерација на Македонија, бул. "Кузман Јосифовски - Питу" бр. 15, 1000 Скопје © 2015 Copyright