Јуниорската машка репрезентација на Македонија (до 20 години), денеска пристигна во Рогла, Словенија, каде веќе го одработи и првиот тренинг пред двата пријателски натпревари против домашната селекција.
По подготовките во Скопје и Маврово во изминатиот период, нашата Јуниорска репрезентација походот кон Европското Првенство во Данска го продолжува со тренинзи и два подготвителни натпревари во Словенија. Во фантастични услови во Рогла, избраниците на Александар Јовиќ попладнево го одработија првиот тренинг во спортската сала каде утре (петок) од 18:30 часот ќе ја одиграат првата пријателска средба против домашната репрезентација, која исто така е учесник на Европското Првенство.
За сабота од 13:00 часот, предвиден е уште еден пријателски меч помеѓу Македонија и Словенија, по што нашата селекција ќе замине за Умаг, Хрватска, каде ќе ја одработи последната фаза од подготовките, до заминувањето за Колдинг на 27 јули.
Во периодот на подготовките во Умаг, Македонија ќе одигра два подготвителни натпревари против Хрватска, кои ќе бидат и последен тест пред континенталниот шампионат. На Европското Првенство во Данска, Македонија се наоѓа во Групата Ц каде ќе се сретне со домаќинот, Норвешка и Холандија.