Екипата на Металург 2 и наредната сезона ќе се натпреварува во ВИП Суперлигата, откако на синоќешниот бараж натпревар што се играше на неутрален терен во Прилеп, ја совлада Преспа 2010 со 31-24.
Иако Преспа беше тимот што подобро го почна натпреварот и рано поведе со 6-2, скопјани до крајот на првото полувреме успеаја да ја надополнат негативата и да направат пресврт за водство од 15-14 на паузата. Се играше изедначено во првите минути во второто полувреме, кога Металург 2 при резултат 20-20 направи серија од 5-1 и го прв пат стигна до поопипливо водство кое не го испушти до крајот за конечни 31-24.
Димитар Димитриоски со 12 голови го предводеше Металург 2, а во листата на стрелци се запишаа и Танкоски со 7, Шилегов со 5, Лазаревски со 4 и Гошевски со 3 гола. Кај Преспа, прв стрелец беше Илија Јошевски кој постигна 6 голови, додека Антонио Наумовски додаде 5.
По овој бараж натпревар, познато е дека Металург 2 и наредната сезона ќе се натпреварува во Суперлигата, додека Преспа повторно ќе игра во Првата лига. Првите натпревари од лигашкиот дел се предвидени да се играат наредниот викенд.
