Кадетската женска репрезентација на Македонија (до 17 години) во склоп на подготовките за настап на ЕХФ Шампионатот што во Скопје ќе се игра од 31 јули до 6 август, периодов се наоѓа во Бугарија каде игра два натпревари против соодветната домашна селекција.

Првата средба се одигра синоќа и во неа Бугарија славеше со резултат 23-20. Бугарија подобро го отвори мечот и дојде до предност од 3 гола, а таа предност ја одржуваше и до крајот на првото полувреме кое заврши со резултат 12-8.

На средина од второто полувреме Бугарија со 4 гола во низа поведе со највисоки 20-14, па и покрај тоа што избраничките на Јулијана Дамчевска одиграа добро во завршницата и ја намалија негативата, немаа време за комплетен пресврт. Македонија се доближи најмногу до два гола негатива, а со голот во последната минута од мечот, домашниот состав ги постави конечните 23-20.

Денеска ќе се одигра и втората подготвителна средба помеѓу Бугарија и Македонија, по што нашите ракометарки се враќаат во Скопје и продолжуваат со редовните тренинзи до стартот на ЕХФ Шампионатот.

ЕХФ Шампионатот ќе се игра во СРЦ „Кале“ во Скопје од 31 јули до 6 август 2017 година. Македонија е во група со Полска, Швајцарија, Грција и Фарски Острови. Според распоредот, првиот меч нашата репрезентација ќе го одигра на 1 август од 17:00 часот против Грција.